Æfingabúðir í Júdó í Svíþjóð

Frá æfingabúðum IK Södra Judo í Stokkhólmi í Svíþjóð. Mynd: Ragnheiður Blöndal Benediktsdóttir.

Iðkendur Júdódeildar Tindastóls lögðu land undir fót ásamt iðkendum frá Pardusi á Blönduósi og Ármanni í Reykjavík og tóku þátt í æfingabúðum í Júdó í Stokkhólmi í Svíþjóð síðastliðna helgi.

Það voru alls 34 júdóiðkendur, þjálfarar og foreldrar sem skelltu sér í langa helgarferð frá Íslandi til Svíþjóðar á æfingabúðir sem stóðu yfir frá 9. til 12. ágúst. Æfingabúðirnar voru haldnar í sumarbúðum júdófélagsins IK Södra Judo í suðurhluta Stokkhólms í kyrrlátu skógi vöxnu umhverfi. Auk Íslendinganna og gestgjafanna komu einnig iðkendur frá júdófélaginu Linköping Judo en kjarni þessa hóps hefur tvívegis áður hist á æfingabúðum, síðast í Varmahlíð fyrir ári síðan.

Móttökur gestgjafanna voru höfðinglegar. Þeir sáu um að enginn gengi svangur um svæðið með kjarngóðum málsverðum fyrir og eftir gæða júdóæfingar, skipulögðu afþreyingu og tókst að gera þessa júdóhelgi alveg hreint frábæra í alla staði.

Sem dæmi um afþreyingu sem fólk nýtti sér inn á milli júdóæfinga má nefna Gröna Lund Tívolí, Skansen safn og dýragarð, götu- og búðaráp og sund í stöðuvatni í nágrenni sumarbúðanna.

Einn af hápunktum helgarinnar var laugardagskvöldið sem byrjaði með humarveislu og endaði svo á popp- og ísveislu eftir létta júdóæfingu, sem var óvænt skotið inn á milli rétta.

Þó að hópurinn hafi verið kvaddur með úrhellisrigningu á sunnudagsmorguninn stendur upp úr eftirminnileg og veðursæl júdóhelgi þar sem allir fóru nokkru ríkari en þeir komu.

Hér fyrir neðan má sjá má nokkrar myndir frá æfingabúðunum sem teknar voru af Einari Erni Hreinssyni og Ragnheiði Blöndal Benediktsdóttur.