Tsvetan með gull á Haustmóti JSÍ yngri flokka í júdó

Keppendur Júdódeildar Tindastóls á Haustmóti JSÍ yngri flokka. Standandi frá vinstri: Þorgrímur Svavar Runólfsson, Tsvetan Tsvetanov Michevski, Viktor Darri Magnússon og Magnús Elí Jónsson. Fyrir framan: Arnór Freyr Fjólmundsson. Mynd: Einar Örn Hreinsson.

Fimm kepptu fyrir hönd Júdódeildar Tindastóls á Haustmóti JSÍ yngri flokka í júdó sem fram fór í Grindavík í gær.

Haustmót JSÍ (Júdósambands Íslands) yngri flokka var haldið í Grindavík í gær. Keppendur voru samtals 51 frá átta Júdófélögum. Mótið var fyrir árganga 1997 til 2006 og var keppt í aldurs- og þyngdarflokkum.

Vegna fjarlægðar til Grindavíkur var ekið þangað á föstudaginn fyri mót og gist í Grunnskólanum í Grindavík. Eftir vigtun frá 9:30 - 10:00 um laugardagsmorguninn stóð mótið yfir frá 11:00 til 15:00.

Keppendur Tindastóls stóðu sig vel á mótinu og þar bar hæst að Tsvetan Tsvetanov Michevski vann til gullverðlauna í sínum flokki. Í sama flokki varð Þorgrímur Svavar Runólfsson í þriðja sæti, en hann keppti upp fyrir sig í aldri. Viktor Darri Magnússon og Arnór Freyr Fjólmundsson höfnuðu í öðru sæti í sínum flokkum og Magnús Elí Jónsson varð fimmti í sínum flokki. Nánari úrslit mótsins má sjá hér.

Eftir mót hélt hópurinn til Egilshallar og skemmti sér í keilu og snæddi áður en lagt var af stað heimleiðis.